«Өңірлерде деструктивті және радикалды діни идеологияны ұстанушылармен түсіндіру және оңалту жұмыстарын жүргізудің бірыңғай тетіктерін қамтамасыз ету» жобасы шеңберінде Қызылорда облысындағы «AQNIET» ақпараттық-насихаттау және оңалту орталығы» ҚҚ өкілдігі аталған өңірдің түзеу колонияларында қылмыстық жазасын өтеп жатқан сотталған радикалдармен оңалту-профилактикалық жұмысын жалғастыруда. Қызылорда облысы ҚАЖД өкілдігіміздің жұмысының белсенділігі Instagram парақшасында атап өтті. Біз осы жазбаның көшірмесін жасадық.

«Ақниет» оңалту орталығының теологтары жаза өтеу мекемесінде тұрақты түрде дәріс жүргізуде. «Ақниет ақпараттық-насихаттау және оңалту орталығы» қоғамдық қорының филиалы өңірімізде өз жұмысын бастағалы да үш жылдың жүзі болды. Осы уақыт ішінде аталған қордың теологтары мен Қызылорда облысы бойынша ҚАЖ департаменті №60 мекемесінің ТОЖ ұйымдастыру тобының инспекторлары бірігіп біршама жұмыстарды атқарды. Қордың өңіріміздегі жетекшісі Ислам Каюповтың айтуынша білікті мамандарды жұмыспен қамтып отырған аталмыш қордың жұмысы қазіргі таңда өз жемісін беруде.

Осы орайда қор жетекшісі сотталған азаматтарға «Ақида мәселесі» және Мәтуриди ақидасы қазақ халқының хақ сенімі екендігін түсіндіріп, дәлел ретінде қазақ хандығы дәуірінде өмір сүрген ақын-жыраулардың поэзиясына да зер салып, қазақ халқының Хақ дінді берік ұстанғанынан хабардар бола алатындығымызды жеткізді. Оған мысал ретінде Асанқайғы, Шалкиіз, Қазтуған, Ақтамберді, Бұқар, Шөже Махамбет және т.б. еңбектерінде Ханафи-Мәтуриди сенім мектебінің сарыны айқын аңғарылады. Тіпті олардың ізін басқан Ыбырай Алтынсарин, Хакім Абай, Мәшһүр Жүсіп, Шәкәрімдер де Мәтуриди ақидасына берік болғандығын сотталғандарға тарихи дәлелдерді келтіріп, түсіндірме жұмыстарын жүргізді.

Осыған орай жазасын өтеуші азаматтар өз ойларымен бөлісіп отырды.

-Қазіргі таңда біраз ақын-жыраулардың шығармаларымен таныстық. Мен бұрын қазақ халқының өлең-жырларында Ислам тақырыбы жырланатынын білмегедім, - деді өз сөзінде Н. есімді азамат. Екі жақты кешенді түрде жүргізіліп жатқан жұмыстар қазіргі таңда өз нәтижесін беріп жатқандығын нық сеніммен айтуға болады. Алдағы уақытта да осы дәстүр бойынша жұмыстар өз жалғасын тауып, көптеген нәтижелерге қол жеткізілетініне сенім мол. Қызылорда облысы бойынша ҚАЖД.

https://www.instagram.com/p/CqnjLejNaZZ/?igshid=MDJmNzVkMjY%3D